بقلم هشام درويش
كلمة اليوم في الحلقة الرابعة من فقرة كلمة وحدة تجيكم في شكل حكاية قصيرة ياسر كلمة فيها اربعة كلمات “نلحس مسني نرقد متهني …” هالكلمة هاذي خرجت على زوز فيران حشاكم وحاشا من يقرا… فار كبير جربوع على حالو يسكن في حانوت حماص شايخ ومتمتع بالخير الي فيه.. وفار صغرون ضعيفون في حالة تدزو بصبع يطيح… وفي نهار من النهارات تلاقاو بالصدفة… الكبير سال الصغير : تي وينك هالغيبة وشبيك تسليت وبدنك ضعف ياخي وين تسكن ..؟ قالو نسكن في حانوت حجام.. بهت الفار الكبير وقالو بربي فاش قاعد تاكل في حانوت حجام ما فيه كان المقص والخلاص ومكينة الحجامة..قلي فاش قاعد تستقات ..؟ سكت شوية الفار الصغرون وقالو ماو الحجام يحط كل مرة شوية زيت على قطعة طويلة من الجلد تتسمى مسن يمضي عليها الحجام موس الحجامة .. هاك المسن هذاكا وبعد اخر النهار نعملو لحسة تعمل 66 كيف ونغم على راسي ونرقد.. جاوبو الفار الكبير وقالو : شنيا هالميزيريا الي انت فيها ..تبعني للحانوت الي نسكن فيه… فيه الخير بكلو ما يكفي فيران البلاد الكل.. وكان العمل هكاكا مشاو ديقا ديقا لحانوت الحماص ودوب ما دخل الفار الصغير قعد باهت في الشي الي شافو… ماكلة انواع واشكال … وهو هكاكا يقلب ويشوف جات عينيه على فار يفرفط واحل في منداف .. بالوقت سال صاحبو على قصة هالفار المنكوب.. قالو لا لا ..حتى شي.. هذاكا فار حصل في المنداف مولى الحانوت باش يتكي عليه غدوا عالصباح.. وين تلقى عاد الفار الصغير ماهو مالخوف هرب يجري مفجوع وهو يعيط ويصيح “نلحس مسني ..نرقد متهني”

Facebook Comments
FacebookTwitterGmailLinkedIn